Xixón confía en que Llaboral puea convertise nun "centru de referencia"

Pablo de Soto asegura que l'informe recueye datos falsos y opiniones subxetives

El voceru del Gobiernu de Xixón, Jesús Martínez Salvador, amosó esti martes el so enfotu en que'l cese de Pablo de Soto al mandu de Llaboral Centru d'Arte y Creación Industrial sirva pa convertir l'equipamientu nun “centru de referencia" pa toa Asturies, yá que hasta la fecha los datos de visitantes "son mui meyorables".

Martínez Salvador indicó que'l cese del director xerente de Llaboral Centru d'Arte y Creación Industrial pola “perda d'enfotu" na so persona ta avaláu por informes que señalen que, "a nivel de xestión, les coses nun se taben faciendo de la manera más correcta posible".

Pablo de Soto pela so parte asegura que l'informe recueye datos falsos y opiniones subxetives de la responsable del área de Servicios Xenerales y afita que nun se tuvieron en cuenta los sos allegamientos. Sobro'l sofitu del consistoriu xixonés na so última entrevista a TPA n'avientu, Pablo de Soto pidía una mayor implicación.

La destitución de Pablo de Soto como director xerente de Llaboral Centru d'Arte ye l'últimu escalabru d'un equipamientu con dificultaes dende cuasi'l so entamu, en marzu de 2007. Al frente cinco directores en namás 10 años, programes heredaos, perda de patronos y cambeos na so estructura.

El patronatu anuncia un nuevu concursu públicu internacional pa escoyer un nuevu director que se faiga coles riendes d'un centru, que nació como gran referente de los nuevos llinguaxes artísticos n'Asturies.